【ཨ་རིག་གླེན་པའི་གཏམ་རྒྱུད།】 འཆི་སྲོལ་ངན་གི

ཡོང་ཁུངས། ཨ་རིག་གི་ལོ་རྒྱུས་རྒན་པོའི་ངག་སྒྲོས་ལས་དྲངས། རྩོམ་སྒྲིག་པ། ཀླུ་མགོན་རྒྱལ། 2023-10-20 15:39:03 ཀློག་གྲངས།280

སྔོན་ཨ་རིག་གི་རྒན་པོ་གཉིས་ལྷ་སར་མཇལ་སྐོར་དུ་སོང་ནས་བྱམས་ཆེན་ཐོག་ཚད་གསུམ་ཅན་ཞིག་གི་དབུའི་ཐད་དུ་སླེབས་པ་ན། དྲ་མའི་ནང་དུ་མགོ་གཟུར་ནས་བཏང་སྟེ་ནང་གི་བྱམས་སྐུའི་ཞལ་རས་ལ་མཐོང་མཇལ་ཞིག་བྱས་རྗེས། མགོ་དྲང་མོར་དྲ་མ་ལས་ཕྱིར་འཐེན་པས་དྲ་མ་ལས་ལེན་མ་ཐུབ། དེ་ལྟར་ཡང་ཡང་འཐེན་ཡང་ལེན་མ་ཐུབ། འགྲོ་རོགས་ཀྱིས་རྐང་བ་ནས་བཟུང་སྟེ་ཡང་ཡང་འཐེན་རུང་ལེན་མ་ཐུབ་པས། ཁོ་ཐབས་ཟད་དེ་འགྲོ་རོགས་ལ། འུ་གཉིས་འདིར་བསྡད་པས་ཀྱང་དགོས་པ་མེད་འདུག ཁྱོད་ཡུལ་ལ་སོང་། ངའི་ཡུལ་མི་ཚོར་ང་རྒན་པོ་འཆི་ས་བཟང་གི རྗེ་བཙུན་བྱམས་པའི་ཞལ་ལ་བལྟས་ནས་འཆི་ཐུབ། འཆི་སྲོལ་ངན་གི མུ་གེ་བྱུང་ནས་འཆི་བ་ལས་གཞན་མེད་ཅེས་སྐད་འདི་ཤོད་ཅེས་བཤད་པ་ན། བྱམས་སྐུས་ཞལ་ནས། ཁྱེད་ཀྱིས་དང་པོར་མགོ་ཇི་ལྟར་ནང་དུ་བཅུག་པ་ཡིན་ཞེས་གསུངས་པ་ན། ཁོས་ཤུགས་ཀྱིས་སྔོན་བཞིན་འདི་ལྟར་བཅུག་ཅེས་སྔར་བཞིན་བྱས་པ་ན་མགོ་ཕྱིར་ལོན་སོང་བས་ཕྱིས་སུ་བྱམས་སྐུ་དེར་བྱམས་པ་གསུང་འབྱོན་མ་ཞེས་གྲགས་སོ།།

རྩོམ་གོང་མ། > 【ཨ་རིག་གླེན་པའི་གཏམ་རྒྱུད།】ལྷ་ཁང་གི་ཐོག་སོར་མཇལ་བ།
རྩོམ་གཞུག་མ། > 【ཨ་རིག་གླེན་པའི་གཏམ་རྒྱུད།】རྟ་ནག་པོའི་ཁོག་ཏུ་ཅི་ཡང་མི་འདུག