གླུ་ཐ་ལ་ལ་མོ་ཐ་ལ་ལེན།།
ཨ་ལ་ལ་མོ་ཨ་ལ་རེད།།
ཤར་གཡུ་ལོ་བཀོད་པའི་ཞིང་ཁམས་སུ།།
དུང་ལོ་འབར་བའི་ཕོ་བྲང་ན།།
གསེར་ལོ་འབར་བའི་ཁྲི་སྟེང་ན།།
མ་ཐུགས་རྗེ་སྒྲོལ་དཀར་ཚེ་ཡི་ལྷ།།
རྩེ་གཅིག་ཡིད་ཀྱིས་གསོལ་བ་འདེབས།།
ཚོགས་ཟག་མེད་དགའ་སྟོན་སྩལ་ཏུ་གསོལ།།
ས་འདི་ཡི་ས་ངོ་མ་ཤེས་ན།།
གླིང་ཚོ་ཆེན་ལྷ་སྡེ་དཀར་པོ་རེད།།
གླིང་འདུ་ཐང་སྤང་ལྗོངས་ཕྱུག་མོ་རེད།།
གླིང་བདེ་སྐྱིད་ཆགས་པའི་གསེར་གཞོང་རེད།།
མ་ང་དང་ང་ངོ་མ་ཤེས་ན།།
ས་གླིང་དཀར་ཕུ་དྲུག་འདབས་དང་བདུན།།
སྐྱ་རེངས་གད་པའི་རྔམ་དང་བརྒྱད།།
དུང་མཚོ་དཀར་མོའི་རླབས་དང་དགུ།།
ཕོ་བྲང་སྟག་རྩེ་ཟིལ་དང་བཅུ།།
བཅུ་འཛོམས་བཀྲ་ཤིས་ར་བ་ནས།།
དགའ་སྐྱ་ལོའི་སེང་ལྕམ་འབྲུག་མོ་ཡིན།།
གླུ་འདི་ཡི་གླུ་ངོ་མ་ཤེས་ན།།
ཨ་སེར་མོའི་དགུ་སེང་དྲུག་འགྱུར་ཟེར།།
ང་ཤ་ཁྲག་གཟུགས་སུ་གྲུབ་ན་ཡང་།།
ལྷ་སྒྲོལ་མ་དཀར་མོའི་སྤྲུལ་པ་ཡིན།།
སྐྱེ་སྔོན་མའི་ལས་དབང་སྨོན་ལམ་གྱིས།།
ཡབ་སྐྱ་ལོ་སྟོན་པའི་སྲས་མོ་རེད།།
གཟུགས་སྐྱེས་པ་མི་འདྲ་བྲིས་པ་འདྲ།།
མིང་གཞན་འདོགས་མི་དགོས་རང་གྲུབ་ཡིན།།
དཀར་ཡག་གངས་ནས་སེང་གེ་འགྱིང་།།
དོག་མོ་ས་ནས་ལྕམ་དཀར་འཁྲུངས།།
ལྷོ་སྤྲིན་གསེང་ནས་གཡུ་འབྲུག་གྲགས།།
སེང་ལྕམ་འབྲུག་མོ་དེ་ནས་ཐོགས།།
སྐྱ་ལོའི་སེང་ལྕམ་འབྲུག་མོ་ངས།།
གླིང་སེང་ཆེན་རྒྱལ་པོར་ཞུ་བ་འབུལ།།
མཐོན་པོའི་གཉའ་གནོན་གནང་མཁན་དགོངས།།
དམའ་བའི་འདབས་ནས་སྐྱོང་མཁན་གསོན།།
སྟོབས་བཅུ་རྫོགས་པའི་ཟིལ་གནོན་ཉོན།།
ང་སྔོན་བསགས་ལས་ཀྱི་ཇ་མར་ཐོན།།
རྐྱེན་ཚོགས་བསགས་ཆུང་བས་གསོན་སྐྱུར་རྒྱབ།།
སྨན་ང་ལ་ཞྭ་ཅིག་ཡོད་པ་འདི།།
ཕྱི་རི་མོ་གཡུ་འབྲུག་ཁ་སྤྲོད་བབས།།
ནང་རི་མོ་བཀྲ་ཤིས་རྟགས་བརྒྱད་བབས།།
ལོགས་རི་མོ་རྨ་བྱའི་འདབ་བརྒྱད་ཡོད།།
ཞྭ་ཁ་རྒྱན་གླང་ཆེན་འགྱིང་འདྲ་ཡོད།།
ཞྭ་ལུང་འཇའ་ཚོན་སྣ་ལྔ་ཡོད།།
མི་སུ་ལ་མི་སྟེར་དམ་བཅའ་ཡོད།།
གླིང་སེང་ཆེན་རྒྱལ་པོ་ཁྱེད་ལ་འབུལ།།
ངའི་ལག་ན་ཡོད་པའི་ཆང་སྐྱེམས་དེ།།
ཆང་འདི་ཡི་ལོ་རྒྱུས་བཤད་པས་ན།།
གནམ་ཨ་སྔོན་སྤྲིན་གྱི་དབྱིངས་རུམ་ནས།།
ལྷོ་གཡུ་འབྲུག་སྔོན་མོས་ངར་སྐད་བསྒྲགས།།
གསེར་འོད་ཅན་གྱི་གློག་དམར་འཁྱུགས།།
བདུད་རྩི་བསིལ་མའི་སྦྲང་ཆར་བབས།།
སྦྲང་ཆར་དེ་ཡི་དྭངས་མའི་བཅུད།།
ཆང་དེ་ནས་ས་གཞིའི་དཀྱིལ་ལ་བབས།།
ས་དོག་མོ་རིན་ཆེན་གསེར་གཞོང་ན།།
འབྲུ་སྣ་ལྔའི་ལོ་ཏོག་ཞིང་ལ་འཁྲུངས།།
སྟོན་འབྲུ་དྲུག་ཡག་ལ་ཟོར་བས་བྲེག །
མཛོ་ཁྱུང་དཀར་ཡག་ལ་ཆ་མཉམ་བྱས།།
རྡོ་གོར་མོ་ཡག་ལ་འུར་ཞིང་དྲུད།།
ཤིང་ལྕང་དཀར་ཡག་ལ་ཁེམ་སྟེང་ནས།།
རླུང་སྐྱི་སེར་ཡག་ལ་དགུང་དུ་ཕྱར།།
ས་གྲུ་བཞིའི་བང་མཛོད་ཆེན་པོའི་ནང་།།
སྨུག་སེང་ངེ་ནས་འབྲུའི་གང་ཞིང་དར།།
ཆང་དེ་ནས་རྒྱ་ཐབ་བརྒྱུད་ནས་དར།།
རྒྱ་ཐབ་ཁྲ་མོའི་ཁྲི་ཐོག་བརྒྱུད།།
འཁར་ཟངས་བཀྲ་ཤིས་འཁྱིལ་བའི་ནང་།།
སྣམ་དཀར་རས་ཀྱིས་དག་གཙང་བྱས།།
སྔོན་མོ་ཆུ་ཡི་རླངས་ཀྱིས་བཙོས།།
དམར་པོ་མེ་ཡི་ངར་ལས་དར།།
དེ་ནས་བལ་གདན་དཀར་མོའི་སྟེང་།།
ཉིང་ཁུ་ཕབ་ཀྱིས་ངར་ཞིག་བཏབ།།
ཁྱོན་ཡངས་རྫ་མའི་ནང་དུ་བསྙལ།།
དེ་ལོ་ལ་བསྙལ་བའི་ལོ་ཆང་རེད།།
ལོ་ཆང་བདུད་རྩི་ཁམ་པ་ཟེར།།
ཟླ་ལ་བསྙལ་བའི་ཟླ་ཆང་རེད།།
ཟླ་ཆང་བདུད་རྩི་བསིལ་མ་ཟེར།།
ཞག་ལ་བསྙལ་བའི་ཞག་ཆང་རེད།།
ཞག་ཆང་བདུད་རྩི་འཁྱིལ་བ་ཟེར།།
གླིང་གེར་འཛོ་གཉན་པོའི་ཚེ་ཆང་རེད།།
སྐུ་སེང་ཆེན་རྒྱལ་པོའི་སྒྲུབ་ཆང་རེད།།
ན་ནིང་གི་ལོ་ཆང་ཁམ་པ་ལ།།
ད་ལོའི་འབྲས་ཆང་སིལ་མ་བཏབ།།
སྦང་མ་ཁ་ལ་ལྡིང་བ་ལ།།
བྱ་ཐང་དཀར་རྩེ་སྒྲོ་རྒྱས་པ་འདྲ།།
བར་ལ་འཁོར་ལོ་འཁོར་བ་འདྲ།།
འཁོར་ལོ་རླུང་གིས་བསྐྱོད་འདྲ་ཡིན།།
གཏིང་ན་ཡོད་པ་ཉ་མོ་འདྲ།།
ཉ་གསེར་མིག་ཆུ་ནས་བུད་འདྲ་ཡིན།།
ཕར་ལ་ཕུས་ཤིག་བཏབ་ཙ་ན།།
རི་སྲིབ་སྨུག་པས་བཟུང་འདྲ་ཡིན།།
ཚུར་ལ་ཧུབ་ཅིག་འཐུང་ཙ་ན།།
བྱིའུ་ནག་ཆུ་ལ་རུབ་འདྲ་ཡིན།།
དབང་ཆེན་པོའི་དཔོན་གྱིས་བཞེས་པ་ན།།
ཐུགས་རྒྱ་ཆེན་མཁའ་དང་མཉམ་པ་ཡིན།།
ཕོ་སྙིང་མེད་ལམ་འགྲོའི་སྐྱེལ་མ་ཡིན།།
དཔའ་དགྲ་ལ་མཆོང་པའི་ངར་མདོག་ཡིན།།
སྟེང་ལྷ་ལ་མཆོད་ཕུལ་གྱུར་ན།།
ལུས་ཁྲབ་ཆེན་རྨོག་དཀར་དབུ་འཕང་མཐོ།།
གཡས་གཉན་ལ་མཆོད་ཕུལ་གྱུར་ན།།
ཕྱག་གཡས་མཐེབ་རྩལ་མདའ་ཤུགས་ཆེ།།
གཡོན་ཀླུ་ལ་མཆོད་ཕུལ་གྱུར་ན།།
གཡོན་པའི་མཆོག་དཀར་གཞུ་མོ་བརྟན།།
ཆང་འདི་བཞེས་ཡོན་ཏན་མང་པོ་ཡོད།།
ཆང་འདི་འདྲ་བོད་ན་དཀོན་པ་ཡིན།།
མཐོ་མི་ཆེན་དཔོན་པོའི་བཞེས་རྒྱུ་རེད།།
སེམས་སྡུག་བསྔལ་ཅན་ལ་བདེ་བ་སྟེར།།
སྐྱིད་གླུ་དང་གར་གྱི་འབྱུང་ཁུངས་རེད།།
སྐུ་སེང་ཆེན་རྒྱལ་པོས་ཆང་འདི་བཞེས།།
གླིང་གཙུག་རྒྱན་ནོར་བུ་བཞུགས་རོགས་མཛོད།།
ཅེས་གླིང་རྗེ་གེ་སར་རྒྱལ་པོའི་སྒྲུང་ཆོས་སྒྲུང་དང་བཤད་པ་རྣམ་བདུན་ལས་དྲངས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注