《གེ་སར་གསོལ་མཆོད་རིག་གནས་ཞིབ་འཇུག》ཅེས་པ་ཉེ་ཆར་མཚོ་སྔོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམ་སྤེལ་བྱས།

《གེ་སར་གསོལ་མཆོད་རིག་གནས་ཞིབ་འཇུག》ཅེས་པ་ཉེ་ཆར་མཚོ་སྔོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམ་སྤེལ་བྱས།

《གེ་སར་གསོལ་མཆོད་རིག་གནས་ཞིབ་འཇུག》ཅེས་པའི་དེབ་འདིར་རྩོམ་པ་པོས་ཡིག་ཐོག་དང་ངག་ཐོག་ཡིག་ཆ་རྩ་ཆེན་གང་མང་སྤྱད་དེ་གེ་སར་སྒྲུང་གི་གསོལ་མཆོད་རིག་གནས་ཀྱི་སྐོར་ལ་ཞིབ་འཇུག་བགྱིས་ཤིང་། གེ་སར་སྒྲུང་གི་གསོལ་མཆོད་ཡིག་ཆའི་རིགས་དང་དབྱེ་བ། གེ་སར་སྒྲུང་གི་གསོལ་མཆོད་ཡིག་ཆ་དང་བོད་ཀྱི་སྲོལ་རྒྱུན་རྩོམ་རིག་ལས་གསོལ་མཆོད་ཡིག་ཆའི་འབྲེལ་བའི་སྐོར་དང་། གེ་སར་གསོལ་མཆོད་ཡིག་ཆ་ལས་འཕྲོས་ཏེ་བོད་ཀྱི་རི་ཆུའི་རིག་གནས་དང་སྲོལ་རྒྱུན་སྐྱེ་ཁམས་ལྟ་བའི་སྐོར་བརྗོད་ཡོད་པས། འདིའི་ཐད་ཀྱི་ཞིབ་འཇུག་གི་སྟོང་ཆ་བསྐངས་ཡོད་པར་མ་ཟད། བོད་ཀྱི་རྩོམ་རིག་དང་གསོལ་མཆོད་རིག་གནས་ཞིབ་འཇུག་ཐད་ཀྱི་དཔྱད་གཞིའི་རྒྱུ་ཆ་གལ་ཆེན་ཞིག་གོ།

སྙིང་བོ་ཚེ་རིང་། མཚོ་སྔོན་པོའི་ལྷོ་རྒྱུད་ཀྱི་རྒྱ་ཡེ་སྡེ་བར་སྐྱེས། ད་ལྟ་མཚོ་སྔོན་ཞིང་ཆེན་གེ་སར་སྒྲུང་སྲུང་སྐྱོབ་ཞིབ་འཇུག་ལྟེ་གནས་ཀྱི་ཀྲུའུ་རིན་གཞོན་པ་དང་ཞིབ་འཇུག་པ་ཆེན་མོ་ཡིན།《ཡུལ་ཤུལ་ས་ཁུལ་གྱི་གེ་སར་རིག་གནས་རྟོག་ཞིབ་དང་ཞིབ་འཇུག》སོགས་སྔ་ཕྱིར་རྒྱལ་ཁབ་དང་ཞིང་ཆེན་རིམ་པའི་ཞིབ་འཇུག་ལས་གཞི13ལ་མགོ་འཛིན་དང་གསབ་ཞུགས་བྱས། 《གླིང་གེ་སར་སྒྲུང་ལ་དཔྱད་པ་བློ་གསལ་ཡིད་ཀྱི་དགའ་སྟོན》སོགས་རིག་གཞུང་ཆེད་དེབ5དང་སྒྲིག་སྒྱུར་དེབ4 དཔྱད་རྩོམ32 《སྒ་སྡེ་ཤེས་རབ་ཁྲོ་རྫོང》སོགས་སྒྲུང་དཔེ20ལེགས་སྒྲིག་བྱས་ཤིང་བསྒྱུར་དེབ1བཅས་སོ།། རྒྱལ་ཁབ་དང་ཞིང་ཆེན་རིམ་པའི་བྱ་དགའ་མང་པོ་ཐོབ་མྱོང་ཞིང་། མཚོ་སྔོན་ཞིང་ཆེན་གྱི་ཁུ་ནུ་འཇོན་མི་མཐོ་རྩེའི་གསར་གཏོད་དང་ལས་གཏོད་འཇོན་མིའི་སྣེ་ཁྲིད་ཤེས་ལྡན་མི་སྣ་བཅས་སུ་བདམས་ཡོད།