ཤེས་བྱའི་རྣམ་གྲངས་ཐོར་བུ། དགུ་བ།

ཤེས་བྱའི་རྣམ་གྲངས་ཐོར་བུ།       དགུ་བ།

ཁྲི་སྐོར་བཅུ་གསུམ། འགྲོ་མགོན་ཆོས་རྒྱལ་འཕགས་པས་སེ་ཆེན་རྒྱལ་བོའི་བཀའ་འབྲེལ་བཞིན་དབུས་གཙང་ལ་དབང་བསྒྱུར་སྐབས་སུ་བཙུགས་པའི་ཁྲི་སྐོར་ས་ཁུལ་ཏེ་ལ་སྟོད་ལྷོ་བྱང་གཉིས་དང༌། གུར་མོ། ཆུ་མིགཤངས། ཞ་ལུ་སྟེ་གཙང་ལ་ཁྲི་སྐོར་དྲུག རྒྱ་མ་དང༌། འབྲི་གུང༌། ཚལ་བ།  ཐང་བོ་ཆེ། ཕག་མོ་གྲུ  གཡའ་བཟང་སྟེ་དབུས་ལ་ཁྲི་སྐོར་དྲུག དབུས་གཙང་གི་མཚམས་སུ་ཡར་འབྲོག་སྟག་ལུང་ཁྲི་སྐོར་གཅིག་སྟེ་ཁྲི་སྐོར་བཅུ་གསུམ།   

གནས་བརྟན་བཅུ་དྲུག ཤཱཀྱ་ཐུབ་པས་བསྟན་པ་གཉེར་དུ་གཏད་པའི་དགྲ་བཅོམ་པ་བཅུ་དྲུག་སྟེ།  ༡ ཡན་ལག་འབྱུང༌། ༢ མ་ཕམ་པ། ༣ ནགས་ན་གནས།  ༤དུས་ལྡན། ༥ རྡོ་རྗེ་མོའི་བུ། ༦བཟང་བོ། ༧ གསེར་གྱི་བེའུ། ༨བྷ་ར་དྷྭ་ཛ་གསེར་ཅན། ༩ བ་ཀུ་ལ། ༡༠སྒྲ་གཅན་འཛིན། ༡༡ལམ་ཕྲན་བསྟན། ༡༢ བྷ་ར་དྷྭ་ཛ་བསོད་སྙོམས་ལེན། ༡༣ ལམ་ཆེན་བསྟན།  ༡༤ ཀླུའི་སྡེ། ༡༥ སྦེད་བྱེད། ༡༦མི་ཕྱེད་པ་སྟེ་བཅུ་དྲུག་གོ། 

མི་ཆོས་གཙང་མ་བཅུ་དྲུག ༡ ལྷ་དཀོན་མཆོག་གསུམ་ལ་མོས་གུས་བསྐྱེད་པ།  ༢ དམ་པའི་ཆོས་བཙལ་ཞིང་སྒྲུབ་པ།  ༣ ཕ་མ་ལ་དྲིན་ལན་འཇལ་བ། ༤ ཡོན་ཏན་ཅན་ལ་ཞེ་མཐོང་ཡོད་པ། ༥ རིགས་མཐོ་བ་དང་རྒན་པར་བཀུར་སྟི་ཆེ་བ།  ༦ ཡུལ་མི་ཁྱིམ་མཚེས་ལ་ཕན་གདགས་པ། ༧ བཀའ་དྲང་ཞིང་སེམས་ཆུང་བ།  ༨ ཉེ་དུ་མཛའ་བཤེས་ལ་གཞུང་རིང་བ། ༡༠ ཟས་ནོར་ལ་ཚོད་འཛིན་པ། ༡༡སྔར་དྲིན་ཅན་གྱི་མི་རྩད་བཅད་པ། ༡༢ བུ་ལོན་དུས་སུ་འཇལ་ཞིང་བྲེ་སྲང་ལ་གཡོ་མེད་པ། ༡༣ ཀུན་ལ་ཕྲག་དོག་ཆུང་བ། ༡༤ ངན་པའི་གྲོས་ལ་མི་ཉན་ཞིང་རང་ཚུགས་འཛིན་པ། ༡༥ ངག་འཇམ་ཞིང་སྨྲ་བ་ཉུང་བ། ༡༦ ཐེག་པ་ཆེ་ཞིང་བློ་ཁོག་ཡངས་པ་བཅས་སོ།།

ཁམས་བཅོ་བརྒྱད། དམིགས་པ་ཡུལ་གྱི་ཁམས་དྲུག་དང༌། རྟེན་དབང་བོའི་ཁམས་དྲུག བརྟེན་པ་རྣམ་ཤེས་ཀྱི་ཁམས་དྲུག་སྟེ་བཅོ་བརྒྱད། དང་བོའི་དྲུག་ནི། གཟུགས། སྒྲ  དྲི། རོ། རེག་བྱ། ཆོས། གཉིས་པའི་དྲུག མིག་གི་དབང་བོ་དང་རྣ་བའི་དབང་བོ།  སྣའི་དབང་བོ།  ལྕེའི་དབང་བོ། ལུས་ཀྱི་དབང་བོ།  ཡིད་ཀྱི་དབང་བོ། གསུམ་པའི་དྲུག་ནི། མིག་གི་རྣམ་ཤེས་དང་རྣ་བའི་རྣམ་ཤེས། སྣའི་རྣམ་ཤེས།  ལྕེའི་རྣམ་ཤེས།  ལུས་ཀྱི་རྣམ་ཤེས།  ཡིད་ཀྱི་རྣམ་ཤེས་བཅས་བསྡོམས་པས་ཁམས་བཅོ་བརྒྱད་དེ་ཁམས་བཅོ་བརྒྱད་ཀྱང་ཟེར་རོ།།