འབྲོག་མོ་ཆོས་དབྱིངས་སྐྱིད།
རྟ་ནག་གྲགས་པ།
བླ་མཚོ་ཁྲི་ཤོར་རྒྱལ་མོའི་ཉེ་འགྲམ་གྱི།།སྙིང་རུས་ཅན་གྱི་མདའ་བཞིའི་འབྲོག་མོ་ཁྱོས།།ཤར་ནུབ་མི་རིགས་མང་པོའི་ཁ་སྔུན་ནས།།འཛམ་གླིང་ཨོ་རྩལ་རྒྱལ་ཁའི་ལོ་རྒྱུས་བསྐྲུན།།ཞུམ་མེད་སྤོབས་པའི་ཡ་གླིང་ཟིན་ཐོ་བཀོད།།ཁ་སང་བརྙན་མིག་ནང་ནས་མཐོང་བ་ན།།རྒྱུག་ལ་འགྲན་མེད་གཤོག་པ་ལོས་ཡོད་འདྲ།།རྒྱ་སྟག་དམར་ཡག་བཞིན་དུ་མཆོངས་ནས་ཡོང་།།ཨོ་རྩལ་འགྲན་རིམ་འདི་ནས་ཁྱོད་རྒྱལ་ཏེ།།གསེར་གྱི་རྟགས་མ་སྐེ་ན་འོད་ལམ་ལམ།།འབྲོག་མོ་རང་ཚུགས་ཅན་ཁྱོད་དང་པོ་རེད།།རྒྱལ་ཁབ་ཕྱི་ནང་ཀུན་གྱི་གསར་འགྱུར་ནང་།།མཚན་སྙན་མེ་ཏོག་གང་སར་བཞད་པའི་ཁྱོད།།ཁ་བ་བོད་ཀྱི་རེ་བའི་སེམས་ནང་གི།ཕྱི་རབས་མི་ལ་རེ་བ་བསྐྲུན་མཁན་ཡིན།།འབྲོག་མོའི་ཁོག་དཔུང་མ་ཤོར་དེ་ཡིས་ཆོག།མི་ལོ་བཅུ་ཡི་དཀའ་སྡུག་རྔུལ་ཆུ་ཡིས།།དེ་རིང་ཐོབ་པའི་གསེར་གྱི་རྟགས་མ་ཟུང་།།མཚོ་སྔོན་ལོ་རྒྱུས་སྟེང་གི་ཐོག་མ་ཟེར།།ལ་རྒྱའི་མིག་ཆུ་ཕྱིས་དང་ཆོས་དབྱིངས་སྐྱིད།།དེ་རིང་མི་ཚོགས་ཀློང་ནས་འཛུམ་གྱིས་དགོད།།སྐྱེས་ས་འབྲོག་ཡིན་འབྲོག་མོ་ངོ་མ་ཁྱོད།།ཡ་གླིང་དང་ནི་ཨོ་རྩལ་འགྲན་ཚོགས་སུ།།མགོ་སེར་ཡ་མེད་དེ་ཚོའི་གྲལ་དབུས་སུ།།གསེར་གྱི་རྟགས་མ་སྔ་ཕྱིར་གཉིས་བླངས་ན།།བོད་ཀྱི་འབྲོག་མོ་འདི་ལ་ཞེ་ནས་དུངས།།རྒྱལ་ཁའི་གྲུབ་འབྲས་ཐོད་ལ་བཟུང་ནས་ཡོང་།།གསེར་གྱི་རྟགས་མ་རུམ་ལ་བཅུག་སྟེ་ཡོང་།།ཕ་ཡུལ་ཕྱོགས་ལ་འཛུམ་གྱིས་གང་དེ་ཡོང་།།གྱི་ལིང་རྟ་ཕོའི་བང་གིས་སྔོན་བསུས་ཏེ།།རྟེན་འབྲེལ་ཚིག་གིས་སྨོན་འདུན་ཡང་ཡང་ཞུ།།
༢༠༢༣ ༡༠ ༡༡ ཉིན་བྲིས
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注