རྨི་ལམ་འཁྲུགས་པའི་ཞོགས་པ། རྩོམ་པ་པོ། གཅན་མེ་སྟག

རྩོམ་པ་པོ།  གཅན་མེ་སྟག

མདང་དགོང་རྨི་ལམ་འཁྲུགས་འཁྲུགས་ཏེ།

ཞོགས་པར་ཡར་ལངས་དུས།

དཔྱི་མགོ་དང་རྐང་མཐིལ་བར་དུ།

རྣོ་ལྕགས་ཀྱི་ལྡེམ་རྩིབ་ཅིག་སྤྲད་པ་དང་འདྲ་བར།

གསིག་ཅིང་གསིག་ཅིང་འགྲོ་ལ།

མེ་ལོང་ནང་ཤར་བའི་ངོ་གདོང་ནི།

བསྡུས་བརྗོད་ཀྱི་རི་མོ་ཞིག་དང་འདྲ་བར།

མཚོན་དོན་མི་གསལ་བའི་ཁ་དོག་ཅིག་གིས་ཡོངས་སུ་གཡོགས་འདུག

ལག་པའི་མཐེ་བོང་འགུལ་ཙམ་བྱས་ན།

གཟེར་ཟུག་ཅིག་དཔུང་རྩ་ནས་གློ་སྦུག་བར་དུ་འགྲོ་ལ།

སྣ་སྦྲིད་ཅིག་ཤེད་ཀྱིས་བརྒྱབ་ན།

རིག་པ་ཞིག་རྨོངས་དུབ་བེར།

ཀླད་རྩ་ནས་བྲང་གཞུང་བར་དུ་མུན་ནག་གིས་འགྲོ

ཡིན་ནའང་དགའ་འོས་པ་ཞིག་ལ།

ངའི་མིག་དང་རྣ་བ་ལ་སྐྱོན་ཆེར་མི་འདུག་སྟེ།

མིག་གིས།  སྒེའུ་ཁུང་ཕྱིའི་ཡོ་འབོག་སྡོང་བོ་དེ་མཐོང་ཐུབ་ལ།

རྣ་བས།  སྡོང་བོའི་ཡལ་ག་ན་འཐམ་འཁྱུད་བྱེད་པའི།

བྱེའུ་ཕོ་མོ་དེའི་འཁུན་སྒྲ་འང་ཐོས་ཐུབ།