མདའ་བཞི་ས་ཆའི་མནོལ་སྐྲ་ལེན་སྟངས་ངོ་སྤྲོད་མདོར་བསྡུས།
སྤྱིར་ས་ཆ་རེ་ན་དཔེ་རེ་དང་ལུང་བ་རེ་ན་ཆུ་རེ་ཞེས་པའི་དཔེ་བཞིན་དུ་བྱིས་པའི་མནོལ་སྐྲ་ལེན་སྲོལ་ཡང་ས་ཆ་སོ་སོ་དང་སྡེ་བ་རེ་རེའི་ཆོ་ག་ཕྱག་ལེན་ཚད་མི་འདྲ་མོད། སྐབས་འདིར་ང་ཚོས་མདའ་བཞི་ས་ཆའི་བྱིས་པའི་མནོལ་སྐྲ་ལེན་སྲོལ་གྱི་རྣམ་པ་ངོ་སྤྲོད་མདོར་བསྡུས་ཙམ་བྱེད།
མནོལ་སྟོན་ཞེས་པ་བྱིས་པ་ལོ་གསུམ་ལ་བུད་པའི་སྐབས་དགའ་སྟོན་རྟེན་འབྲེལ་གྱི་ཆོ་ག་སྤེལ་བའི་མཛད་སྒོ་ཞིག་ཡིན། མནོལ་སྐྲ་ལེན་པའི་དུས་སྐབས་ཆེས་བཟང་བ་ནི་ལོ་སར་གྱི་སྐབས་ཡིན་པ་དང་དེ་ཡང་སྤྱིར་བཏང་དུ་ལོ་སར་ཚེས་གཅིག་དང་ཚེས་གསུམ། ཚེས་ལྔ། ཚེས་བཅུ་གསུམ་སོགས་ལ་མནོལ་སྐྲ་ལེན་པའི་སྲོལ་ཡོད།
མནོལ་སྐྲ་ལེན་པའི་ཉིན་དེར། ནམ་སྐྱ་རེངས་མཐའ་ནས་མ་བཀྱགས་གོང་བྱིས་པའི་ཨ་ཕས་ལྷ་བསང་བཏང་ནས་བསང་འབོད་བར་སྣང་ཁམས་ནས་གོ་བ་ཞིག་བྱས་ཏེ། མགོན་སྐྱབས་གོང་མ་ལྷ་ནས་གནང་བར་རེ་བ་ཞུ་དགོས་ཤིང་། བྱིས་པའི་ཨ་མས་ཇ་སྐོལ་ནས་ཇ་མཆོད་ཕུགས་ཀྱི་སྲུང་མར་མཆོད་དེ་བྱིས་པའི་ཁ་འཛིན་མ་དྲོས་ཀླུ་ནས་བྱེད་པའི་སྨོན་ལམ་འདེབས་དགོས།
དེའི་རྗེས་ཉི་ཤར་གྱི་དང་བོ་རྟེན་འབྲེལ་གྱི་མགོ་མར་རང་གི་ནང་མི་དང་ཤ་ཉེ་རིང། རི་སྡེ་ཕུ་ནུ་ཚང་མ་འཛོམས་ཡོད་པའི་སྐབས་སུ། བྱིས་པའི་མནོལ་སྐྲ་ལེན་ཞིང་། མནོལ་སྐྲ་ལེན་མཁན་དེ་ཡང་ཕ་མ་གཉིས་གང་རུང་གི་ཕའམ་མ་སྟེ། བྱིས་པའི་ཨ་མྱེས་དང་ཨ་ཕྱི། ཡང་ན་རང་གི་ཤ་ཉེའི་ནང་གི་མི་རྒན་གཡང་ཅན་ཞིག་གིས་མནོལ་སྐྲ་ལེན་པའི་སྲོལ་ཡོད། མནོལ་སྐྲ་ལེན་མཁན་དེས་ཐོག་མར་བྱིས་པའི་ཁ་རྒྱས་དབང་ཐང་དར་ཞིང་ཚེ་རིང་ནད་མེད་ཡོང་བ། ཚེ་བསོད་རླུང་རྟ་དར་བ་སོགས་ཁ་གཡང་འབོད་དགོས།༼ མནོལ་སྐྲ་ལེན་པའི་མི་དེ་གཏམ་ལ་མཁས་མིན་གྱི་དབང་གིས་ལ་ལས་སྐར་མ་བཅོ་ལྔ་ཉི་ཤུ་ལྷག་གི་རིང་ལ་ཁ་གཡང་འབོད་པ་དང་ཡང་ལ་ལས་ཚེ་རིང་ལོ་བརྒྱ་ཤོག་ཅེས་ཚིག་ཀ་གཅིག་གིས་འཐུས་པར་བྱེད་པའང་ཡོད།༽
ཐོག་དང་པོ་མནོལ་སྐྲ་ལེན་མཁན་དེས་བྱིས་པའི་སྤྱི་གཙུག་ནས་སྐྲ་ཅུང་ཙམ་བྲེག་རྗེས་དེར་འདུས་ཀྱི་མི་ཡོངས་ལ་མནོལ་སྐལ་འཇོག་པ་དང་དེའི་རྗེས་མི་ཚང་མས་བྱིས་པའི་མནོལ་སྐྲ་ཅུང་ཙམ་རེ་འབྲེག་དགོས། དེ་ཡང་ཉེ་རིང་གི་རིམ་པ་དང་རུས་ཀྱི་མཐོ་དམན་ལྟར་དུ་རང་གི་ཁྱིམ་ཚང་གི་ནང་མི་སྤུན་མཆེད་དང་ཨ་ཞང་ཨ་ཁུ་སོགས་ཀྱིས་བྱིས་པའི་སྤྱི་གཙུག་གི་མདུན་ནས་མནོལ་སྐྲ་ལེན་དགོས་ཤིང་དེ་ནི་ནང་མིའི་མནོལ་སྐལ་ཡིན། ཡང་ཉེ་རིང་གི་ཚད་ཐིག་ཅུང་རིང་བའམ་ཤ་ཁྲག་གི་འབྲེལ་བ་མེད་པའི་སྡེ་མི་ཡིན་ན་བྱིས་པའི་སྤྱི་གཙུག་གི་ལྟག་རྒྱབ་ནས་མནོལ་སྐྲ་ལེན་དགོས། དེ་ནི་ཕྱི་མིའི་མནོལ་སྐལ་ཡིན། དེ་ལྟར་མནོལ་སྐྲ་ལེན་པའི་སྐབས་སུ་བུ་ཆུང་གི་མགོ་ནས་རལ་བ་འཇོག་དགོས་པ་དང་བྲེག་ཟིན་པའི་མནོལ་སྐྲ་དེ་ལ་མནོལ་མནོལ་ཟེར་ཞིང་། དེ་བལ་སྐུད་དཀར་བོ་ཞིག་གིས་བཙེམ་རྗེས་འཇོན་འབུ་ཞིག་དང་ཆོ་རིལ་མིག་བཞི་ཞིག་བཅས་བྱིས་པའི་གྱོན་པའི་རྒྱབ་ལ་འདོགས་པ་མ་ཟད། བྱིས་པའི་རལ་བའི་ནང་དུ་གཡུ་གཉིས་དང་བྱུ་རུ་ལྡོག་པོ་གཅིག་རེ་འདོགས་པའི་སྲོལ་ཡོད།
རལ་གཡུ་ནི་ཚེ་རིང་ཞིང་ནད་མེད་པ་བཀྲ་ཤིས་ཤིང་དོན་འགྲུབ་པའི་རྟེན་འབྲེལ་གལ་ཆེན་ཞིག་ཏུ་བརྩི་བ་ཡིན།
བྱིས་པའི་མནོལ་སྐྲ་ལེན་སྐབས་ཤ་ཉེ་རིང་རྣམས་ཀྱིས་རང་ཉིད་ཀྱི་འཛོམས་ཚོད་ཀྱིས་ལེགས་སྐྱེས་སྟེར་བའི་སྲོལ་ཡོད་ལ་ལེགས་སྐྱེས་སྟེར་སྐབས་བྱིས་པའི་རལ་ཙོར་ཞིག་གི་དོད་དམ་ཡང་ན་རལ་རྔ་ཡིན་ཞེས་སྟེར་དགོས།
མནོལ་སྐྲ་བླངས་ཚར་རྗེས་ཚང་མས་ཇ་ཆང་གི་དཔལ་ལ་རོལ་བཞིན་གླུ་དང་གླུ་ཤགས། རྩེད་རིགས་སོགས་འཁྲབ་སྟོན་བྱས་ནས་ཁྲོམ་པ་སྐྱིད་ལ་འགུག་ངེས་ཡིན།
གསལ་བཤད། བྱིས་པའི་མནོལ་སྐྲ་ལེན་སྟངས་སྐོར་ལ་རྣམ་གྲངས་མི་འདྲ་བ་མང་བོ་ཡོད་ནའང་ཡུལ་ལུང་གཞན་དང་ཁྱད་པར་ཆེན་པོ་མེད་པས་འདིར་ཆེད་དུ་ཐུན་མོང་མ་ཡིན་པའི་ཆ་ཙམ་ལས་བརྗོད་མེད། །
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注