དབུ་འཇིགས་མེད། མཚོ་ལྷོ།
བརྩེ་བའི་མགུལ་རྒྱན།
སྣང་བའི་ལས་ཀྱིས་བཏུས་པ།།
མེ་ཏོག་འཛུམ་དཀར་སྒྲོལ་མ།།
བརྩེ་བའི་མུ་ཏིག་མགུལ་རྒྱན།།
བྱམས་པའི་སྐེ་ལ་བཏགས་པ།།
མི་རྟག་སྤྲིན་པ་འགུལ་འགུལ།།
ཡིད་ཀྱི་ཚོར་བ་འགུལ་བྱུང་།།
ཚིག་གི་འདབ་མ་ཐར་ཐོར།།
བསྡུས་ནས་སྙན་ངག་གྲུབ་པ།།
སྣང་སེམས་སྤྲུགས་པའི་ཚོར་བ།།
སྟོང་ཆེན་ལུང་བར་བརྒལ་བ།།
ངག་རིག་མཚོ་མོའི་འཛུམ་ལ།།
དྲན་གདུང་དབྱངས་སུ་སྦྱར་བ།།
ཆར་བ་སེམས་སུ་ཐིམ་བྱུང་།།
ནམ་མཁའ་འཛུམ་གྱིས་ཕྱུག་པ།།
ཉི་ཟླའི་བྱིན་རླབས་ཡིན་ཕྱིར།།
བརྩེ་བའི་དབྱངས་ཅན་དྲན་པ།།
རྨི་ལམ་ལམ་འཕྲང་བརྒལ་ནས།།
དབྱངས་ཅན་དྲན་པའི་ཚོར་བ།།
སྲིད་པའི་དབྱིངས་སུ་བཞུད་པ།།
འགོག་མེད་རང་བྱུང་དྲན་པ།།
སྙན་ངག་ཉི་འོད་འཕྲོས་འཕྲོས།།
དབྱངས་ཅན་ལྷ་མོར་འཕྲོས་པ།།
ཚིག་གི་འཛུམ་འགྱུར་མཆོད་པ།།
ཞེ་བློ་གཙང་མས་འབུལ་འདོད།།
རྣམ་རྟོག་གི་སྒྱུ་རྩལ།
ཆོ་འཕྲུལ་ངག་རིག་རྒྱ་མཚོ།།
གངས་ཀྱི་ལུང་བར་སྦྱར་བ།།
མཛེས་སྡུག་སྟོང་གིས་བརྒྱན་པ།།
ངག་རིག་ལྷ་ཡི་བྱིན་རླབས།།
རྣམ་རྟོག་ངག་གླུ་མགུར་མ།།
དྭངས་གསལ་ཆུ་ལ་བསྐུར་ན།།
སྣང་སྟོང་ལྷོ་སྤྲིན་དཀར་མོ།།
ཐུགས་རྗེའི་པདྨོ་འཛུམ་བྱུང་།།
རྟོག་བཏགས་ཚིག་གི་གར་མ།།
ཚོར་བའི་འོད་ཟེར་འཁྱུག་ས།།
སྣང་སེམས་ཡེ་ཤེས་འོད་ལ།།
ལྷ་ཡི་བྱིན་རླབས་འཁོར་ས།།
རྣམ་རྟོག་སྒྱུ་འཕྲུལ་ཚོགས་ལ།།
གཉུག་མའི་ཁ་དོག་ཆགས་པ།།
ལས་ཀྱི་ཚོར་བའི་འདབ་མ།།
དབྱིངས་ཀྱི་ཟླ་བར་ཕུལ་བ།།
རྣམ་རྟོག་མཐའ་བྲལ་ཆུ་མོ།།
སྟོང་ཆེན་ལུང་བར་སྙོག་པ།།
ལས་ཀྱི་ཞེན་ཆགས་འཚོལ་བ།།
ཚིག་གི་རྨི་ལམ་རྨིས་བྱུང་།།
མི་རྟག་རྣམ་རྟོག་སྒྱུ་འཕྲུལ།།
ཚོར་བའི་ཤུགས་གླུ་ཡིན་པ།།
ཚིག་འགྱུར་ངག་གི་པད་མོ།།
དབྱངས་ཅན་ལྷ་ལ་ཕུལ་བ།།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注