གངས་རིའི་བུ་མོ་ཆོས་དབྱིངས་སྐྱིད། ཨ་ཏའི་བུ་རྒྱུད།

གངས་རིའི་བུ་མོ་ཆོས་དབྱིངས་སྐྱིད། 

ཨ་ཏའི་བུ་རྒྱུད།

མཐོ་སྒང་འབྲོག་ཡུལ་མདའ་བཞི་གཡང་གི་སྡེ། །

གཡང་གི་ཁ་རྒྱན་འབྲོག་མོ་ཆོས་དབྱིངས་སྐྱིད། །

བོད་ནས་འཛམ་གླིང་ཨོ་རྩལ་འགྲན་ཚོགས་སུ། །

མུ་ནས་ཐེངས་གསུམ་ཞུགས་པའི་ཐོག་མ་རེད། །

ཡ་གླིང་འདུར་རྒྱུག་ཟིན་ཐོ་བཏོད་ནས་བཟུང་། །

དུང་ཕྱུར་དུ་མའི་ཡིད་དབང་ཀུན་ནས་འཕྲོགས། །

ཁྱེད་ཀྱི་རྒྱལ་ཕམ་རིགས་དང་རྒྱལ་ཁབ་འདིའི། །

ཐུན་མོང་ང་རྒྱལ་ཡིན་ཞིང་གཟི་བརྗིད་ལགས། །

གོམ་ཆུང་རེ་རེར་སྨོན་འདུན་ཁྲི་ཕྲག་འཛོམས། །

གོམ་འགྲོས་རེ་རེས་རེ་བཞག་འབུམ་ཕྲག་ཁུར། །

གོམ་གསུམ་སྤོས་ན་སེམས་ལ་དགའ་བདེ་སྟེར། །

གོམ་ཁ་ཡངས་པའི་ཁྱེད་རང་ཡང་ཡང་བསྟོད། །

འབོད་སྐུལ་མི་དགོས་སྤུན་ཟླའི་རྒྱབ་སྐྱོར་འདུ། །

གདན་ཞུ་མི་དགོས་སྨྱན་སྦྱོར་མགྲོན་དུ་འཁོར། །

དྲང་བདེན་གཏའ་མར་བཞག་ནས་ཀྲུང་གོ་ཡི། །

འཐུས་ཚབ་བྱེད་ནུས་དཔའ་མོ་ཁྱེད་ལ་འདུད། །

དཀའ་བའི་སྦྱོང་བརྡར་རྒྱུན་གྱི་བརྩོན་པ་ཡིས། །

འདུར་རྒྱུག་ལོ་རྒྱུས་གསེབ་ཏུ་བོད་མིང་བཀོད། །

གསེར་དངུལ་རྟགས་མ་ཁྱིམ་གང་ཐོབ་པ་དེས། །

དཔལ་དུ་སྒེག་པའི་ཁྱེད་རང་མངོན་པར་སྤྲས། །

ཁྱེད་ཀྱི་སྙིང་སྟོབས་ཆེན་པོས་ངོ་མཚར་བསྐྲུན། །

ཁྱེད་ཀྱི་རུས་ཞེན་ཟབ་མོར་མཚན་སྙན་འབར། །

དབྱངས་གསལ་མ་བསྐྱུར་ཕུགས་འདུན་མ་བརྗེད་པའི། །

གངས་ལྗོངས་ལུས་རྩལ་རྒྱལ་མོ་གུས་པར་འོས། །

བསམ་པའི་དོན་ལ་གྲུབ་པའི་རྒྱལ་མཚན་མཐོ། །

འདོད་པའི་ལས་ལ་སྨིན་པའི་འབྲས་བུ་འཕྱུར། །

མ་འོངས་རྒྱལ་སྤྱིའི་འགྲན་སྡུར་གང་རུང་ནས། །

ཁྱེད་འདྲའི་གངས་ཕྲུག་མང་པོ་མཐོང་བར་ཞུ། །

ཟླ་ཚེས་བཟང་པོར་གསེར་དངུལ་རྩྭ་ཐང་དུ།