གསེར་གྱི་མགུལ་རྒྱན།
རྨ་ཨ་ཀྲོང་དཀར་པོ།
དུས་རབས་གསར་བའི་མི་ཚོགས་མང་པོའི་དབུས། །
རང་ལུས་རྩལ་གྱིས་འཛམ་གླིང་གོ་ལ་འགུལ། །
མི་རིགས་མང་པོའི་དགའ་བའི་ཐལ་སྒྲ་སྒྲོགས། །
གཡུ་འབྲུག་སྐད་སྙན་ལྡིར་སྒྲའི་ངོ་མཚར་ཆེ། །
མཐོ་སྒང་བུ་མོའི་སྐད་གྲགས་མཛངས་མའི་མཆོག །
སྔོན་ལས་རྐང་མགྱོགས་འགྲུབ་པའི་ཆོས་དབྱིངས་སྐྱིད། །
ཨོ་རྩལ་གསེར་གྱི་རྟགས་མའི་མཚན་སྙན་ལ། །
སོར་བཅུའི་ཐལ་མོ་ས་ཡ་དྲུག་གིས་རྡེབ། །
གྲོགས་དང་གཉེན་ཉེ་དགའ་བའི་གཏམ་སྙན་ཞིག །
རྒྱང་རིང་ཡུལ་ནས་བརྙན་དང་མགྱོགས་འཕྲིན་ནས། །
ཨོ་རྩལ་གསེར་གྱི་རྟགས་མ་བླངས་བ་བསྒྲགས། །
གངས་ལྗོངས་མི་དམངས་ཡོངས་ལ་སྤྲོ་སེམས་རྒྱས། །
རིན་ཆེན་གསེར་གྱི་མགུལ་རྒྱན་འོད་པོ་ཆེ། །
རྩལ་འཛོམས་མཛངས་མ་ཆོས་དབྱིངས་སྐྱིད་ལ་ཐོབ། །
སྒང་བ་བོད་པའི་སྙིང་སྟོབས་སྤོབས་པ་མཚོན། །
ཚེ་ཐག་རིང་བའི་བུ་མོ་ལྷ་ཡིས་སྐྱོབས། །
རྒྱབ་རི་གངས་དཀར་ལྷུན་པོ་མཐོ་ཞིང་བརྗིད། །
མདུན་བསྐྱོད་ཁྲི་ཤོར་རྒྱལ་མོའི་རླབས་རྒྱུན་རིང་། །
སྙན་གྲགས་བ་དན་དཀར་པོ་ཕྱོགས་བཅུར་འཕྲོ། །
སྙན་ངག་སྲོལ་རྒྱུན་བཅད་མའི་གཏང་རག་འབུལ། །
གངས་ལྗོངས་ལུས་རྩལ་སྦྱོང་བའི་གཞོན་སྐྱེས་ཚོར། །
མ་འོངས་ལམ་འདིར་ཞུགས་པའི་སྤོབས་པ་བསྩལ། །
འཛམ་གླིང་ལས་རྩལ་འགྲན་སྡུར་གང་སྤེལ་ན། །
དེ་རུ་ཞུགས་མཁན་ཁྱེད་འདྲ་ཡོད་པར་སྨོན། །
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注