​ཁྲེན་ཀང་གིས་ཟི་ལིང་གྲོང་ཁྱེར་དུ་རྟོག་ཞིབ་གནང་བ།

ཁྲེན་ཀང་གིས་ཟི་ལིང་གྲོང་ཁྱེར་དུ་རྟོག་ཞིབ་གནང་བ།

ཟླ10པའི་ཚེས8ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཁྲེན་ཀང་གིས་ཟི་ལིང་གྲོང་ཁྱེར་ཁང་སའི་ཐོན་ལས་ལས་གཞིའི་ཡུལ་དངོས་དང་ཚོང་ལས་ཕྱོགས་བསྡུས་གཞི་གཟུགས་ཆེན་མོ། རིག་གནས་ཡུལ་སྐོར་ཁམས་གསོ་ཁེ་ལས་སོགས་སུ་རྟོག་ཞིབ་ཟབ་མོར་སྤེལ་ཏེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཀྲུང་དབྱང་ཆབ་སྲིད་ཅུའུ་ཚོགས་འདུ་ཐོག་གི་གསུང་བཤད་གལ་ཆེན་གྱི་དགོངས་དོན་ལག་བསྟར་དངོས་འབེབས་ཟབ་མོ་བྱེད་པ་དང་། བྱེད་ཐབས་སྣ་མང་མཉམ་སྤྱོད་སྒོས་འཛད་སྤྱོད་བག་ནུས་ཟབ་མོར་འདོན་པ། ཁྲོམ་རའི་གསོན་ཤུགས་མུ་མཐུད་དུ་སློང་བ། སྐྱེ་ཁམས་ཡུལ་སྐོར་ལྟེ་གཅིག་འདེགས་སྐྱོར་ནུས་པ་བཏོན་ནས། ཞིང་ཆེན་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ཀྱི་གདོང་མཆོང་དམག་ལེགས་པོ་བྱེད་དགོས་ཞེས་ནན་གྱིས་བསྟན།

འདས་མ་ཐག་པའི་བཅུ་པའི་གནང་བའི་སྐབས་ཀྱི་གསེར་ལྟ་བུའི་གཟའ་འཁོར་ལ། ཞིང་ཆེན་ཡོངས་སུ་རིམ་རྩིས་ལྟར་ན་ཡུལ་སྐོར་པ་མི་ཐེངས་ཁྲི288.2སྣེ་ལེན་བྱས་པ་དང་། ཚོང་རྫས་ཁང་པ་དང་རླངས་འཁོར། ཁྱིམ་ཆས་སོགས་ཕྱིར་ཚོང་ལ་ཚ་རླབས་བསྐྱར་དུ་འཕྱུར་ཅིང་། འཛད་སྤྱོད་བག་ནུས་མྱུར་ཏུ་གློད་གྲོལ་བྱུང་། ཁྲེན་ཀང་ཟི་ལིང་གྲོང་ཁྱེར་ཧའེ་ཧུའོ་ཁུལ་གསར་གྱི་ཁང་སའི་ཐོན་ལས་ལས་གཞི་མཁར་ལྗང་ཅིན་ཡུའུ་ཡོན་དུ་ཕེབས་ནས། ཁང་ཚོང་ལྟེ་གནས་དང་དཔེ་མཚོན་ཁང་པར། ཚོང་རྫས་ཁང་པའི་ཕྱིར་ཚོང་གནས་ཚུལ་དང་ལས་གཞི་འཛུགས་སྐྲུན་འཕེལ་འགྲོས་ལ་རྒྱུས་ལོན་ཞིབ་མོ་གནང་བ་དང་། ས་གནས་དེ་གའི་ཁང་སའི་ཐོན་ལས་མཁར་གཅིག་ཇུས་གཅིག་གི་ལས་དོན་བྱེད་ཐབས་དངོས་འབེབས་གནས་ཚུལ་ལ་གསན་རྗེས། ཁོང་གིས་སྲིད་ཇུས་བྱེད་ཐབས་ཁག་བེད་སྤྱོད་ལེགས་པོ་བྱེད་པ་དང་། ཁང་པ་སྤྲོད་པར་འགན་ལེན་དང་རིན་གོང་བརྟན་འཇགས། འཛད་སྤྱོད་ལ་སྐུལ་བ། ཁོར་ཡུག་ལེགས་སྒྱུར་གྱི་ལས་དོན་ཁག་ངེས་པ་དོན་གྱིས་ལེགས་པར་སྒྲུབ་པ། ཐོན་ཁུངས་དགེ་མཚན་འདོན་པ། ཁྲོམ་རའི་ཡིད་ཆེས་འདེགས་པ། དྲང་བདེན་སྤྱི་སྙོམ་གྱི་འགྲན་རྩོད་ཁོར་ཡུག་ལེགས་པོ་མུ་མཐུད་དུ་སྐྲུན་པ། ཚད་གཡོལ་ཁང་པ་སོགས་རྣམ་པ་གསར་པ་དང་བརྒྱུད་ལམ་གསར་པ་འཚོལ་ཞིབ་བྱས་ཏེ། ཁང་སའི་ཐོན་ལས་ཁྲོམ་ར་བརྟན་འཇགས་བདེ་ཐང་གིས་འཕེལ་བར་སྐུལ་འདེད་གཏོང་དགོས་ཞེས་ནན་གྱིས་བསྟན།

ཟི་ལིང་གྲོང་ཁྱེར་ཝང་ཧྥུ་ཅིན་གླང་ཆེན་མཁར་ཉོ་ཚོང་ལྟེ་གནས་སུ། ཁྲེན་ཀང་ཧྭ་ཝའེ་རིག་ནུས་འཚོ་བའི་གླིང་དང་ཕུགས་འདུན་རླངས་འཁོར་བསིལ་ཚོང་ཁང་དུ་ཕེབས་ནས། ཐུགས་སྤྲོ་རབ་ཏུ་འཕེལ་བའི་སྒོ་ནས་མིག་སྔར་བྲིན་ཆེ་བའི་ཚོང་རྫས་ལ་རྒྱུས་ལོན་གནང་བ་དང་། འཛད་སྤྱོད་ཁ་གསབ་དང་རྙིང་པས་གསར་བརྗེ་སོགས་སྲིད་ཇུས་དངོས་འབེབས་གནས་ཚུལ་འདྲི་རྟོགས་མཛད། ཚོང་རྫས་ཁ་ཤས་བཅུ་པའི་གནང་བའི་སྐབས་སུ་འཚོང་ཚད་འཕར་བ་རྟོགས་རྗེས། ཁོང་གིས་ཚོང་བདག་ལ་འཛད་སྤྱོད་ཀྱི་གནས་བབ་གསར་པ་དང་དགོས་མཁོ་གསར་པ་ཁོང་དུ་ཆུད་པ་དང་། བར་ཁྱད་ཅན་དང་ཁྱད་ཆོས་ཅན་གྱི་འཕེལ་རྒྱས་ངེས་གནས་ཡང་དག་པར་འཚོལ་བ། ཚ་ཚ་འུར་འུར་གྱི་འཛད་སྤྱོད་ཁོར་ཡུག་དང་འཛད་སྤྱོད་མཁའ་དབུགས་སྔར་ལས་ལེགས་པར་བསྐྲུན་པའི་སྐུལ་མ་གནང་བ་དང་། འབྲེལ་ཡོད་སྡེ་ཁག་གིས་འཛད་སྤྱོད་ལ་ཚོད་འཛིན་ཐེབས་པའི་ཁེགས་གནས་དང་འཚང་གནས་སེལ་བར་དམིགས་པ་དང་། དམངས་ཕན་སྲིད་ཇུས་ཀྱི་དྲིལ་སྒྲོག་དངོས་འབེབས་བྱེད་ཤུགས་ཆེར་སྐྱེད་པ། འཛད་སྤྱོད་པར་སྲིད་ཇུས་གསལ་གསལ་དག་དག་གིས་རྟོགས་པ་དང་དངོས་དངོས་བདེན་བདེན་གྱིས་དངོས་ཕན་ཐོབ་ཏུ་བཅུག་ནས། མི་དམངས་མང་ཚོགས་ལ་སྤུས་ཚད་མཐོ་བའི་འཚོ་བའི་དགོས་མཁོ་སྔར་ལས་ལེགས་པར་བསྐང་དགོས་པའི་མངགས་བཅོལ་མཛད།

ཁྲེན་ཀང་ད་དུང་ཟི་ལིང་གི་རིག་གནས་ཡུལ་སྐོར་ཐོན་ལས་ཞབས་ཞུ་ལྟེ་གནས་དང་མཚོ་འཕགས་ལེགས་ཤོས2200ཁམས་གསོ་ལྟེ་གནས། ནགས་ཚལ་ཡུལ་སྐོར་རང་སྐོར་རླངས་འཁོར་འཁོར་ཁང་སྒར་ས་སོགས་སུ་ཕེབས་ནས། ཟི་ལིང་གི་རིག་གནས་ཡུལ་སྐོར་ཐོན་ལས་འཕེལ་རྒྱས་དང་ཁམས་གསོ་ལས་གཞི་འཆར་འགོད། སྟོན་དགུན་དུས་ཚིགས་ཁྱད་ལྡན་བྱེད་སྒོ་འཆར་འགོད་སོགས་ཀྱི་གནས་ཚུལ་ལ་རྒྱུས་ལོན་གནང་བ་དང་། ཡུལ་དངོས་སུ་རིག་གནས་ཡུལ་སྐོར་ཁེ་ལས་ཀྱི་འགན་ཁུར་པའི་བསམ་འཆར་གྲོས་གཞི་གསན་པ། ཕྱི་ཡུལ་གྱི་ཡུལ་སྐོར་པ་དང་མཚོ་སྔོན་ལ་ཡུལ་སྐོར་དུ་ཡོང་བའི་ཚོར་བ་གླེང་མོལ་ལྷུག་པར་མཛད། ཁོང་གིས་ཞིང་ཆེན་དང་ཡུལ་ཁོངས་བརྒལ་བའི་ཡུལ་སྐོར་མཉམ་ལས་ཐོག་ཐོད་རྒལ་གསར་པ་མངོན་དུ་འགྱུར་བར་ཇེ་མགྱོགས་སུ་གཏོང་བ་དང་། སྤུས་ལེགས་ཡུལ་སྐོར་ཐོན་ཁུངས་གནས་སྦྲེལ་ཕྲེང་བ་ཆགས་པར་བྱས་ཏེ། གཞི་གཅིག་ཅན་གྱི་ཡུལ་སྐོར་འཕེལ་རྒྱས་ལ་སྐུལ་འདེད་གཏོང་དགོས། ཡུལ་སྐོར་ལས་རྣམ་དང་ཐོན་རྫས་མཁོ་སྤྲོད་ཕུན་སུམ་ཇེ་ཚོགས་སུ་གཏོང་བ་དང་། སྟོན་དགུན་དུས་ཚིགས་ཀྱི་ཡུལ་སྐོར་བག་ནུས་ཤུགས་ཆེན་པོས་སྔོག་འདོན་བྱེད་པ། མཚོ་སྐོར་ལྕགས་རྟ་འགྲན་སྡུར་དང་ན་གཞོན་རིམ་འདས་མཉམ་འབྲེལ་འགྲན་སྡུར་སོགས་ཀྱི་ཚོང་རྟགས་ཐབས་བསྒྲིགས་མ་ལེགས་པར་བཏོན་ཏེ། རིག་གནས་ཡུལ་སྐོར་ལུས་རྩལ་འདྲེས་སྦྱོར་འཕེལ་རྒྱས་ལ་སྐུལ་འདེད་གཏོང་དགོས། ཡུལ་སྐོར་ཞབས་ཞུ་སྤུས་ཀ་མུ་མཐུད་དུ་ཇེ་མཐོར་གཏོང་བ་དང་། རྨང་གཞི་སྒྲིག་ཆས་གདང་འདེགས་རིམ་སྤོར་ལ་སྐུལ་འདེད་གཏོང་བ། ཡུལ་སྐོར་དང་འབྲེལ་བའི་ཞུ་གཏུག་དུས་ལྟར་ཐག་གཅོད་ལེགས་པོ་བྱས་ཏེ། ཡུལ་སྐོར་པ་མཚོ་སྔོན་ལ་ཡུལ་སྐོར་དུ་འོང་བར་སྔར་ལས་སེམས་བདེ་སྟབས་བདེ་ཡོང་བར་བྱེད་དགོས། སྲིད་གཞུང་གིས་སྟེགས་བུ་རྩིག་པ་དང་ཁེ་ལས་ཀྱི་ཟློས་གར་འཁྲབ་པའི་རྣམ་པ་བརྒྱུད་ནས་མཐོ་སྒང་གི་ཁམས་གསོ་ཐོན་ལས་མྱུར་ཏུ་འཕེལ་རྒྱས་བཏང་ནས། ཁྲོམ་རས་དང་དུ་ལེན་པ་དང་འཛད་སྤྱོད་པས་ཡིད་ཚིམ་པ། ཁེ་ལས་ཀྱིས་མུ་མཐུད་དུ་གཉེར་སྐྱོང་ཐུབ་པའི་འཁོར་རྒྱུག་ལེགས་པོ་ཆགས་པར་བྱེད་དགོས་ཞེས་ནན་གྱིས་བསྟན།

ཞིང་ཆེན་མགོ་ཁྲིད་ཝང་ཝའེ་ཏུང་དང་ཝང་ལིན་ཧུའུ། ཀྲུའུ་ཞང་ཧྥིང་། ཧུའུ་ལོས་ཁྲུན་བཅས་འབྲེལ་ཡོད་རྟོག་ཞིབ་ལ་ཞུགས།