ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག༼ ཁག19པ།༽

ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག༼  ཁག19པ།༽

དོན་ཚན་གྱ་བདུན་པ། ཏང་ཡོན་གྱི་བརྡས་ཐག་གཅོད་དབང་དང་། འདེམ་བསྐོའི་དབང་ཆ། གདམ་བྱའི་དབང་ཆ་བཅས་ལ་གནོད་འཚེ་བཏང་ཚེ། ཉེས་ཚབས་ཅུང་ཆེ་རིགས་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

བཙན་ཤེད་དང་། འཇིགས་སྐུལ། མགོ་སྐོར། སླུ་བྲིད་སོགས་ཀྱི་བྱེད་ཐབས་སྤྱད་དེ། ཏང་ཡོན་གྱིས་བརྡས་ཐག་གཅོད་དབང་དང་། འདེམ་བསྐོའི་དབང་ཆ། གདམ་བྱའི་དབང་ཆ་བཅས་རང་བདག་གིས་སྤྱོད་པར་གནོད་རྐྱེན་བཟོས་རིགས་ལ། ཏང་ནང་གི་གོ་གནས་མེད་པར་བཟོ་རྒྱུ་དང་། ཏང་ནང་བཞག་ནས་ལྟ་ཞིབ་བྱེད་པའམ་ཡང་ན་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་གྱ་བརྒྱད་པ། གཤམ་གསལ་གྱི་བྱ་སྤྱོད་ལས་རིགས་གཅིག་ཡོད་ཚེ། དེའི་ཐད་ཀའི་འགན་འཁྲི་ཡོད་མཁན་དང་འགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཅུང་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ་སྟེ།

(གཅིག) སྐྱོན་བརྗོད་དང་ཐེར་འདོན། གཏུག་བཤེར་བཅས་ལ་བཀག་འགོག་དང་བཙན་གནོན་བྱས་པའམ་ཡང་ན་སྐྱོན་བརྗོད་དང་། ཐེར་འདོན། གཏུག་བཤེར་བཅས་བྱས་པའི་དཔྱད་གཞི་རང་དགར་བཀག་ཉར་དང་མེད་པར་བཟོས་པའམ་ཡང་ན་རྐང་བཙུགས་ནས་མི་གཞན་ལ་ཤེས་སུ་བཅུག་རིགས།

(གཉིས) ཏང་ཡོན་གྱིས་གནས་ལུགས་ཞུ་བ་དང་། དག་འབུད་དང་བདེན་དཔང་བྱེད་པ་སོགས་ལ་བཙན་གནོན་བྱས་ནས་མཇུག་འབྲས་ངན་པ་བཟོས་རིགས།

(གསུམ) ཏང་ཡོན་གྱིས་རྒྱུ་མཚན་ཞུ་འབུལ་བྱེད་པར་བཙན་གནོན་བྱས་ནས་མཇུག་འབྲས་ངན་པ་བཟོས་པའམ་ཡང་ན་འབྲེལ་ཡོད་གཏན་འབེབས་ལྟར་ཏང་ཡོན་གྱི་རྒྱུ་མཚན་ཞུ་འབུལ་ཐག་གཅོད་མི་བྱེད་པའི་རིགས།

(བཞི) ཏང་ཡོན་གྱི་ཁེ་དབང་ལ་གནོད་འཚེ་བཏང་བའི་བྱ་སྤྱོད་གཞན་དག

སྐྱོན་བརྗོད་བྱེད་མཁན་དང་། ཐེར་འདོན་བྱེད་མཁན། གཏུག་བཤེར་བྱེད་མཁན། དཔང་མི། དེ་བཞིན་མི་གཞན་དག་བཅས་ལ་རྡུང་རྡེག་འཁོན་སློག་བྱས་རིགས་ལ། ཆད་པ་ལྕི་མོ་གཅོད་པའམ་ཡང་ན་ཆད་པ་ཇེ་ལྕི་རུ་གཏོང་རྒྱུ།

དོན་ཚན་གྱ་དགུ་པ། ཏང་གི་སྒྲིག་ཡིག་དང་ཏང་ནང་གི་ཁྲིམས་སྲོལ་གཞན་དག་གི་གཏན་འབེབས་དང་འགལ་ཏེ། མི་བདེན་རྫུན་སྒྲིག་གམ་ཡང་ན་བྱེད་ཐབས་གཞན་དག་ལ་བརྟེན་ནས་ཏང་ཡོན་གྱི་ཆ་རྐྱེན་དང་མི་མཐུན་པའི་སྐྱེ་བོ་ཏང་ཡོན་དུ་འཕེལ་རྒྱས་བཏང་བའམ་ཡང་ན་ཏང་ཡོན་མིན་པར་ཏང་ཡོན་གྱི་ཐོབ་ཐང་དཔང་ཡིག་སྤྲད་ཚེ། དེའི་ཐད་ཀའི་འགན་འཁྲི་ཡོད་མཁན་དང་འགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

འབྲེལ་ཡོད་གཏན་འབེབས་ཀྱི་གོ་རིམ་ལས་འགལ་ཏེ་ཏང་ཡོན་འཕེལ་རྒྱས་བཏང་ཚེ། དེའི་ཐད་ཀའི་འགན་འཁྲི་ཡོད་མཁན་དང་འགོ་ཁྲིད་ཀྱི་འགན་འཁྲི་ཡོད་མཁན་ལ་གོང་འཁོད་ནང་གསེས་དོན་ཚན་གྱི་གཏན་འབེབས་ལྟར་ཐག་གཅོད་བྱ་རྒྱུ།